கண்ணன் கையின் குழலாக

ஹரே கிருஷ்ணா
உன் கையின் குழலாக
உலகறிய வேண்டும் நான்
உள்ளே வெற்றிடமாய்...
இருந்தும் நிறைகுடமாய்!
ஓட்டைகளை சில இருந்தாலும்
மறைக்கின்ற தேவையின்றி...
ஸ்திரமாய்... பத்திரமாய்...
நிம்மதியாய்... அமைதியாய்...
என்னிலிருந்து வரும்
ஒலியெல்லாம் இசையாக....
அந்த இசையெல்லாம் உனதாக...
உன் தெய்வீக இதழ்கள்...
என் மேல் பதியட்டும்...
ஆனந்த இசை வெள்ளம்
அளவற்று பரவட்டும்...!

ஸ்ரீ ராமர் மென் பாதம்

ஸ்ரீ ராமர் மென் பாதம் பூ போட்டு பூஜித்தேன்
ஸ்ரீ ராமர் வன் தேகம் பொன் போட்டு அர்ச்சித்தேன்
ஸ்ரீ ராமர் இன் நாமம் எப்போதும் யோசித்தேன்
ஸ்ரீ ராமர் நன் காதை நாள் தோறும் வாசித்தேன்

ஸ்ரீ ராம் ஜெய் ராம் ஜெய் ஜெய் ராம்
ஓம் ஸ்ரீ ராம் ஜெய் ராம் ஜெய் ஜெய் ராம்
ஸ்ரீ ராம் ஜெய் ராம் ஜெய் ஜெய் ராம்
ஓம் ஸ்ரீ ராம் ஜெய் ராம் ஜெய் ஜெய் ராம்

ராமா ராமா ரகு ராமா
அகிலம் போற்றும் பரந்தாமா
ராமா ராமா ரவி ராமா
நான் மறை ஏற்றும் பல நாமா

அன்னையர் ஏங்கும் சிசு ராமா
கோசலை போல் உணவூட்டுகிறேன்
தசரதன் வம்சத்து இசை ராமா
நீ மகிழ வேடிக்கை காட்டுகிறேன்
எளியவர் நண்பா குக ராமா
உனை இதயப் படகில் ஏற்றுகிறேன்
அனுமன் இதயத்தின் குண ராமா
மனதால் மாலைகள் சூட்டுகிறேன்

ராமா ராமா ரகு ராமா
ஜானகி தேவியின் மண ராமா
ராமா ராமா ரவி ராமா
கோதண்டம் ஏந்தும் பல ராமா

அன்பால் ஆளும் வல்லவனே
உனை உயிராய் நானும் எண்ணுகிறேன்
ஞானியர் போற்றும் நல்லவனே
அன்பால் அர்ச்சனை பண்ணுகிறேன்
குற்றம் இல்லா தூயவனே
உனை இன்றே கண்டிட ஏங்குகிறேன்
இணையே இல்லா இனியவனே
உன் காலடி தலையால் தாங்குகிறேன்

ராமா ராமா ரகு ராமா
சிவனார் ஜபிக்கும் சிவ ராமா
ராமா ராமா ரவி ராமா
யோகியர் பூஜிக்கும் பரமான்மா

கல்லாய் கிடந்த அகலிகையை
நகக் கண்ணால் நீயும் பார்த்தாயே
பாவம் நீங்கிய உத்தமியை
மீண்டும் இல்லறம் சேர்த்தாயே
ராவணன் கூட சரணடைந்தால்
யோசிக்காமல் ஏற்பாயே
கார்முகில் வண்ண நாயகனே
இணையற்ற அன்பை வார்ப்பாயே

ஸ்ரீ ராம் ஜெய் ராம் ஜெய் ஜெய் ராம்
ஓம் ஸ்ரீ ராம் ஜெய் ராம் ஜெய் ஜெய் ராம்
ஸ்ரீ ராம் ஜெய் ராம் ஜெய் ஜெய் ராம்
ஓம் ஸ்ரீ ராம் ஜெய் ராம் ஜெய் ஜெய் ராம்

ஸ்ரீ ராமர் மென் பாதம் பூ போட்டு பூஜித்தேன்
ஸ்ரீ ராமர் வன் தேகம் பொன் போட்டு அர்ச்சித்தேன்
ஸ்ரீ ராமர் இன் நாமம் எப்போதும் யோசித்தேன்
ஸ்ரீ ராமர் நன் காதை நாள் தோறும் வாசித்தேன்

வீர ராமர்

ராம் ராம் ராம் ஹரே
ராம் ராம் ராம் ஹரே
ராம் ராம் ராம் ஹரே
ராஜா ராம்

ராம் ராம் ராம் ஹரே
ராம் ராம் ராம் ஹரே
ராம் ராம் ராம் ஹரே
சீதா ராம்

ராஜா ராம் ஜெய ராஜா ராம் ஜெய
ராஜா ராம் ஜெய ராஜா ராம்

சீதா ராம் ஜெய சீதா ராம் ஜெய
சீதா ராம் ஜெய சீதா ராம்

மனிதருள் சிங்கம் மாசறு தங்கம்
நற்குண கடலின் உறைவிடமே
மனிதனாய் வந்தாய் மானுடம் காத்தாய்
துளியும் தழும்பா நிறைகுடமே

நல்லவை காக்கும் அல்லவை போக்கும்
அகிலம் ஆளும் மன்னவனே
தர்மம் நிலைக்க அசுரரை அழிக்க
ஆயுதம் எடுத்தால் தென்னவனே

கோபம் இல்லாதவன் கொன்று குவிப்பவன்
கோதண்டம் தாங்கும் கொற்றவனே
சிவவில் பிடித்து சில்லென உடைத்த
இரும்பென இருகரம் உற்றவனே

பெண்மையை மதித்து அச்சத்தை விடுத்து
கோர தாடகை கொன்றவனே
வன்மத்தில் கொதித்து வம்சத்தை அழித்த
கோடறி ராமனை வென்றவனே

எதிரிகள் அஞ்சும் நண்பர்கள் கொஞ்சும்
வீரமும் ஈரமும் வாய்த்தவனே
தன் ஆற்றல்கள் கண்டு ஆணவம் கொண்ட
வானர வாலியை சாய்த்தவனே

வருணனை வென்று வானரம் கொண்டு
இலங்கைக்கு பாலம் செய்தவனே
முதல் நாள் விடுத்து மறுநாள் அழைத்து
ராவணன் தலையை கொய்தவனே

உன் காலடி பிடித்து காமத்தை விடுத்து
அஞ்சனை மைந்தன் மகிழ்ந்தாரே
உன் நாமத்தை ஜபித்து ஆசையை ஜெயித்து
தெய்வ நிலையை அடைந்தாரே

ராம் ராம் ராம் ஹரே
ராம் ராம் ராம் ஹரே
ராம் ராம் ராம் ஹரே
ராஜா ராம்

ராம் ராம் ராம் ஹரே
ராம் ராம் ராம் ஹரே
ராம் ராம் ராம் ஹரே
சீதா ராம்

ராஜா ராம் ஜெய ராஜா ராம் ஜெய
ராஜா ராம் ஜெய ராஜா ராம்

சீதா ராம் ஜெய சீதா ராம் ஜெய
சீதா ராம் ஜெய சீதா ராம்

சப்தரிஷி ராமாயாணம்

சப்தரிஷி ராமாயணம் சுருக்கமானது. ஏழு மகரிஷிகளால் இயற்றப் பெற்றதால் சப்தரிஷி ராமாயணம் என பெயர் பெற்றது. சமஸ்கிருத ஸ்லோகங்களாக இயற்ற பெற்ற இதை ஸ்ரீ ராமரின் திருவருளால் தமிழில் கவிதையாக்கியிருக்கிறேன். இதை படிப்பவர் யாவரையும் காத்தருள வேண்டுமென ஸ்ரீ ராமரை வேண்டி அவர் பொற்பாதங்களில் இதை சமர்ப்பிக்கிறேன்.

காஷ்யப மகரிஷியின் பால காண்டம்

வாரிசு வேண்டுமென தசரதர் வேண்டினார்
சூர்ய குலத்தில் ஸ்ரீ ராமர் தோன்றினார்
விஸ்வாமித்திரரிடம் வித்தைகள் கற்றார்
அஸ்திரங்கள் பல அன்போடு பெற்றார்
கன்னி யுத்தத்தில் தாடகையை கொன்றார்
கௌசிகன் வேள்விக்கு காவலாய் நின்றார்
சுபாகு மாரீசன் இருவரையும் வென்றார்
அகலிகா கல்லின் மேல் அவர் பாதம் பட்டது
பெண்ணாகி நின்றாள் பெற்ற சாபம் விட்டது
ஜனகர் ஆளும் மிதிலை புகுந்தார்
சிவபெருமானின் வில்லை வகுந்தார்
மண்ணின் மகளாம் சீதையை மணந்தார்
ஜானகி ராமனாய் ஊர்வலம் நடந்தார்
வழியில் பரசுராமருக்கு பணிவை தந்தார்
அயோத்தி திரும்பினார் நலமாக
பல்லாண்டு வாழ்ந்தார் வளமாக

அத்ரி மகரிஷியின் அயோத்யா காண்டம்

ஸ்ரீ ராமரின் பட்டாபிஷேக வேளையில்
சூழ்ச்சி தோன்றியது கூனியின் மூளையில்
அதை கைகேயி புத்திக்குள் திணித்தாள்
இரண்டு வரங்களை கேட்கும்படி பணித்தாள்
கைகேயி ஆசையால் ராமர் பாசத்தை மறந்தாள்
மன்னனிடம் இரண்டு வரங்களையும் இரந்தால்
உன் ராமன் காடாள வேண்டும்
என் பரதன் நாடாள வேண்டும்
இதை கேட்டதும் தசரதர் கலங்கினார்
துக்கத்தால் தரையில் விழுந்து மயங்கினார்

பரத்வாஜ மகரிஷியின் ஆரண்ய காண்டம்

தந்தை சொல் காக்க மனம் உகந்தார்
சீதா லக்ஷ்மண சமேத ராமர் வனம் புகுந்தார்
பாவம் போக்கிடும் கங்கையை கடந்தார்
வேடன் குகனின் நட்பை அடைந்தார்
மரவுரி சடை முனி போல தரித்தார்
சித்ரகூடத்தில் சில நாள் வசித்தார்
காண வந்த பரதனை அணைத்தார்
தந்தைக்கான ஈமக்கடன் முடித்தார்
வனத்தில் வசித்தோர்க்கு நன்மை செய்தார்
பின் அகஸ்திய முனிவரின் ஆசிரமம் எய்தார்
முனிவரிடம் பெற்றார் இனிதான அருளும்
அக்ஷ்யவில் எனும் அரிதான பொருளும்

விஸ்வாமித்திர மகரிஷியின் கிஷ்கிந்தா காண்டம்

அகஸ்தியர் சொல்படி பஞ்சவடி சென்றார்
பஞ்சவடியின் முனிவர்களிடம் அபயம் என்றார்
சூர்ப்பணகையின் காதையும் மூக்கையும் சிதைத்தார்
திறம் மிக்க கர தூஷணர்களை வதைத்தார்
மாயம் செய்த பொன்மானை அதம் செய்தார்
வானர தலைவன் வாலியை வதம் செய்தார்
வன ராஜ்யத்தை குண தாரையோடு சுக்ரீவனுக்கு வழங்கினார்
ஆபத்தில் உதவும் நண்பனாக விளங்கினார்

கௌதம மகரிஷியின் சுந்தர காண்டம்

ஆஞ்சநேயர் விளையாட்டாக கடல் தாண்டி குதித்தார்
அசோகவனத்தில் அன்னையை கண்டு துதித்தார்
ஸ்ரீ ராமர் தந்த மோதிரத்தை எடுத்தார்
ஜனகன் மகள் ஜானகியிடம் கொடுத்தார்
அக்ஷன் முதலான அரக்கரை ஒழித்தார்
இலங்கையை நெருப்பால் எரித்தார்
பின் ஸ்ரீ ராமரிடம் வேகமாக பறந்தார்
கண்டேன் சீதையை என மகிழ்ச்சியோடு பகர்ந்தார்

ஜமதாக்னி மகரிஷியின் யுத்த காண்டம்

ஸ்ரீ ராமர் நளன் மூலமாக சேது அணை செய்வித்தார்
வீரம் மிக்க வானரருடன் இலங்கை சென்று கர்ஜித்தார்
கும்பகர்ணன் முதலான அசுரருக்கு எமனாக நின்றார்
ராவணன் அழிந்த அப்பெரும்போரில் வென்றார்
இலங்கை அரசை விபீஷணன் தலையில் முடிந்தார்
ஜெய ராமர் சீதையோடு புஷ்பக விமானத்தில் பறந்தார்
அயோத்யாவின் சிம்மாசனத்தில் மன்னனாய் அமர்ந்தார்

விசிஷ்ட மகரிஷியின் உத்தர காண்டம்

சக்ரவர்த்தி திருமகனான ஸ்ரீ ராமர் மன்னனாய் சிறந்தார்
லக்ஷ்மண பரத சத்ருக்கனரோடு நல்லாட்சி புரிந்தார்
அவர் ஆட்சியில் அஸ்வமேதம் போன்ற வேள்விகள் நடந்தன
மக்கள் மட்டுமல்ல அணில் போன்ற ஜீவன்கள் கூட மகிழ்ந்தன
ஊரார் உறவினர் நண்பர்கள் அனைவரையும் பிழைக்கச் செய்தார்
உயிர்களின் தலைவனான் ஸ்ரீ ராமர் தர்மத்தை தழைக்கச் செய்தார்
பல்லாண்டுகளுக்குப் பின் தம் ராஜ்யத்தை இரண்டாக்கினார்
தம் புதல்வரான லவ குசரை அவற்றுக்கு அரசனக்கினார்
தன்னை நேசித்த மக்களோடு சரயு நதியில் இறங்கினார்
மீண்டும் பரம பதம் சென்று மீண்டும் மஹாவிஷ்ணுவாக விளங்கினார்

பாராயண பலன்

அமுதம் நிகரான ராம காதை ஜபித்தவர்
செய்த பாவங்கள் அனைத்தையும் அழித்தவர்
அறம் பொருள் இன்பம் மூன்றையும் வெல்வர்
தேவர்கள் விஷ்ணுவை துதிக்கும் வைகுண்டம் செல்வர்

ஸ்ரீ பால கணேஷர் அன்பு ஆராதனை

ஓம்
சக்தியின் மடியில்
தவழும் கணேஷா...!

சிவனார் அணைப்பில்
மகிழும் கணேஷா...!

முருகரை அணைக்கும்
மூத்த கணேஷா...!

மாயவர் மாப்பிள்ளை
மங்கள கணேஷா...!

உனை அண்ணனாய் நினைக்க
உள்ளம் துணிந்தேன்...!

நீ அதை உடனே ஏற்க
உன்
பாதம் பணிந்தேன்...!

செயலின் வடிவம்
நீ என
உணர்ந்தேன் நானே...!

Son of Energy
Action தானே...!

நீ மனது வைத்தால்
தடைகள் வராது
மனதை வாட்டும்
தடங்கல் தராது

என் நாத ஆராதனைக்கு
உள்ளம் கரைந்தாய்...!
மறுநாள் காலை
என் கனவுக்குள் விரைந்தாய்...!

எளியவன் துதியை
அன்போடு ஏற்றாய்...!
என் கர்ம வினைகள்
பறந்தன காற்றாய்...!

கொழு கொழு தொப்பையை
ஆசையோடு தொடுகிறேன்...!
மொழு மொழு கன்னத்தில்
முத்தங்கள் இடுகிறேன்...!

அண்ணா என்று
அன்போடு அழைக்கிறேன்...!
என் ஆணவத்தை உன் கோவிலின்
பலி பீடத்தில் வைக்கிறேன்...!

செல்வம் வேண்டாம் புகழும் வேண்டாம்
சித்திகள் வேண்டாம் சிறப்புகள் வேண்டாம்
பட்டங்கள் வேண்டாம் பதவிகள் வேண்டாம்

இன்றும் என்றும்
இப்போதும் எப்போதும்
உன் அன்பு ஒன்று
அதுவே போதும்...!